Tokante Komishon

Komishon Supervishon di Protekshon di Dato Personal BES (Commissie toezicht bescherming persoonsgegevens BES), ku nos lo sigui yama simplemente ‘Komishon’, den su ròl komo instansia independiente di supervishon, tin e tarea di vigilá ku prosesamentu di dato personal ta tuma lugá di akuerdo ku Lei di protekshon di dato personal BES (Wet bescherming persoonsgegevens BES, òf Wbp BES). E lei akí ta regla tur loke tin mag i no tin mag di sosodé ku dato personal di hende i ki derecho un hende tin pa loke ta trata privasidat ora un organisashon prosesá su datonan.
Komishon, lantá na aprel di 2014, tin na su enkargo tambe supervishon di prosesamentu di dato polisial i e atministrashonnan básiko di dato personal BES na Hulanda Karibense.

Na Hulanda Karibense, ta awor a kaba di dal e promé pasonan riba tereno di protekshon di dato personal. P’esei, Komishon a disidí ku den e tres promé añanan, e lo konsentrá prinsipalmente riba dunamentu di informashon i konsientisashon di poblashon riba e tema di protekshon di dato personal. Despues di esei, Komishon lo pasa pa e fase di supervishon.

Loke Komishon ke logra ta pa tantu pueblo en general komo e organisashonnan ku tin riba e islanan bira konsiente di nan responsabilidat di atendé ku dato personal na un manera responsabel.

LESA MAS