Derecho di Inspekshon/akseso

Pregunta tokante inspekshon/akseso di dato

En prinsipio, un siudadano tin derecho di haña mira tur su datonan personal.

General

Plaso pa e organisashon reakshoná: denter di kuater siman, via karta òf e-mail.
Eksepshon: ocho siman si e petishon ta kompliká i/òf si a dirigí mas ku un petishon na e mesun organisashon. Si e organisashon tin mester di mas ku kuater siman pa kontestá, e tin deber di informá bo, denter di e kuater simannan, ku e ta bai tarda mas i dikon.

Verifikashon di identidat

Ora un organisashon risibí un petishon di akseso/inspekshon, mester verifiká identidat di e persona ku ta hasi e petishon promé. Den mayoria di kaso, e organisashon no tin mag di pidi un kopia di e persona su dokumento di identifikashon, a ménos ku e indiká ku esei ta indispensabel pa por hasi e verifikashon. E organisashon mester por garantisá un manera sigur di manda e dokumento menshona.

Ki tipo di informashon por pidi via un petishon di inspekshon/ akseso?

Via e petishon mester por kontrolá si datonan ta korekto i/ òf si e organisashon a prosesá e datonan korektamente. Mester por haña sa tambe ku ken e organisashon ta kompartí e datonan i ku ki propósito.

Ki informashon un persona ku hasi un petishon asina mester risibí?

• Kopia di su datonan personal òf
• Un lista kompleto
• Informashon adishonal, manera:
  • Pa ki propósito ta usa e datonan.
  • E tipo di dato ku ta usa.
  • Ku ken ta kompartí e datonan.
  • Si a transferí dato personal pafó di Boneiru, Sint Eustatius i Saba, i pa ken.
  • Pa kuantu tempu ta keda warda e datonan personal.
  • Ki derecho e tin relashoná ku su privasidat.
  • Kon e organisashon ta optené e datonan personal.
  • Si e organisashon ta tuma desishon na un manera outomatisá tokante persona, entre otro, ‘profiling’.

Kiko ta pasa si e datonan no ta korekto?

Si kualke dato di e persona ku a hasi e petishon ta inkorekto, òf si e organisashon ta usando nan na un manera ku no ta konforme lei, e persona por pidi pa koregí òf kita nan.

Un organisashon tin mag di nenga di honra un petishon di inspekshon/akseso?

• Esei por sosodé, pero sola-mente komo eksepshon (por ehèmpel, si e kantidat di peti-shon hasí ta desproporshonal). Lei ta menshoná algun otro kaso tambe den kua un organisashon por nenga di honra un petishon di akseso.
• Si un petishon di akseso lo okashoná un peso atministrativo sumamente haltu pa e organisashon, e ora ei, den kaso eksepshonal, tambe por nenga e petishon di akseso.

Eksepshon fihá den lei

Den sierto kaso, un organisashon por nenga di duna un solisitante informashon tokante su datonan personal, por ehèmpel, ora esei ta nesesario pa:

1. protehá siguridat di estado;
2. prevenshon, investigashon i persekushon di echo kastigabel;
3. interes ekonómiko i finansiero di peso di estado òf di otro entidat públiko;
4. supervishon di kumplimentu ku disposishon di lei fihá pa protehá e interesnan referí na dje den sekshon b. i c., òf
5. protekshon di e persona konserní, òf di derecho i libertat di otro persona.

Ki ora por nenga un petishon parsialmente

E organisashon por nenga un petishon di akseso parsialmente, por ehèmpel, pa protehá informashon tokante otro persona ku tin den e fail.

Argumento pa nenga un petishon pa inspekshon/akseso

E organisashon mester por mustra ku el a pisa interes di tur e partidonan enbolbí kuidadosamente.