Komunikado di prensa – 27 di yanüari 2016

Dia di privasidat su tema ta doño di trabou i empleado

Kralendijk, 27 di yanüari 2016 – E komishon di supervishon di protekshon di dato personal BES (e Komishon) riba dia internashonal di privasidat ta duna atenshon na e relashon entre doño di trabou i empleado. Pa e komishon e intenshon di e dia e aña aki ta pa drenta diálogo tokante e reglanan ku ta na vigor pa trato di dato personal di kolaboradó.

Dia internashonal di privasidat

For di 2009 organisashonnan ta konmemorá dia di privasidat riba 28 di yanüari. Komo ku hopi informashon personal no ta asina bon protehá manera lo a kere, hopi bia por haña e informashon aki fásilmente i mesun fásil por malus’é. Ta p’esei riba dia di privasidat ta pone atenshon na konsientisashon di e derecho i obligashonnan den e área di privasidat.

E tema relashonnan laboral

E tema ku riba e islanan (di Hulanda Karibense) ta haña mas atenshon na 2016 ta e relashon entre doñonan di trabou i empleadonan ora ta trata di protekshon di dato personal. Den e entidatnan públiko Boneiru, Sint Eustatius i Saba ainda tin hopi falta di konosementu di e reglanan ku ta konta pa e tópiko aki. “Eksaktamente pa motibu di e falta di konosementu aki ta importante pa e aña aki duna hopi atenshon na esaki”, presidente di e komishon Glenn Thodé ta bisa.

“Nos tin e intenshon pa na mart organisá seshonnan na Boneiru, Sint Eustatius i Saba pa algun doño di trabou pa duna informashon tokante e do’s and dont’s i pa diskutí tokante e konsekuensianan di e legislashon riba e tereno aki”, asina Thodé ta sigui splika. “Den e di dos parti di aña (aki) nos ta organisá seshonnan pa e doñonan di trabou ku ainda no a partisipá na e promé ròndu.”

E legislashon di privasidat

Pa haña atenshon pa e legislashon riba tereno di privasidat, i pa duna indikashon tokante su aplikashon, na 2014 a instalá e komishon. “Despues ku nos a duna informashon pa un temporada i a traha riba konsientisashon, riba término ta e intenshon tambe di e komishon pa bai kontrolá aplikashon di e lei”, Thodé ta bisa, “al fin al kabo e lei ta un obligashon.”

E komishon ta un órgano independiente ku ta supervisá e prosesamentu (e.o. wardamentu i uso) di dato personal. Pa hasi e tópiko aki aksesibel pa un públiko grandi e komishon ta publiká hopi informashon riba e wèspsait nobo www.cbpbes.com. Pa pregunta tokante e manera ku mester trata ku dato personal por tuma kontakto ku Roëlla Pourier di e sekretariado:

roella.pourier@rijksdienstcn.com. Telefon +599 7158392.