Vigilansia ku kámara den i rònt di kas

Por pone kámara den i rònt di kas pa protekshon di propiedat i di e habitantenan. Esei no ta prohibí, pero e ta mará na sierto kondishon.

Kondishon pa vigilansia ku kámara
Vigilansia di henter e kaya ya ta bai muchu leu. Ta polis so tin mag di vigilá kaya.

No tin mag di vigilá mas ayá di porta di dilanti di otro bibienda tampoko. Kámara mester ta dirigí di tal manera ku nan no por filma nada ku ta sosodé den kas di otro hende.

Ademas, mester ta opvio ku tin vigilansia ku kámara. Por pone por ehèmpel un bòrchi òf un steker, indikando tambe ken ta responsabel pa e vigilansia ku kámara.

Mi bisiña tin mag di pone un kámara na su kas?

Sí, e tin mag. No ta prohibí pa usa vigilansia ku kámara pa protegé un kas. Si bo ta sinti ku e kámara di bo bisiña ta violá bo privasidat, tin algun paso ku bo por dal.

Ta importante pa sa si e kámara ta sea grabando òf sakando potrèt. Si bo bisiña ta wak so sin graba ni saka potrèt, Lei di protekshon di dato personal BES (Wbp BES) no ta aplikabel. Si bo bisiña ta graba òf saka potrèt, pero pa su mes, sin publiká nan, tampoko Wbp BES no ta aplikabel.

P’esei, den e tipo di kasonan ei, Komishon Supervisor di Protekshon di Dato Personal no por yuda bo. Esei no ke men sí ku un kámara asina no por ta un violashon di bo privasidat.

‘Stalking’ ku kámara
Bo ta sospechá ku bo bisiña ta sigui bo moveshonnan ku su kámara (stalking) na un manera molestoso? Papia ku bo bisiña al respekto. Si papiando riba e asuntu, abo ku bo bisiña no yega na un solushon, bo por hasi un denunsia di ‘stalking’ tambe serka polis.

Finalmente, bo por bai korte tambe, ku asistensia di un abogado.