Vigilansia ku kámara den tienda, horeca i sportclub

Vigilansia ku kámara den òf rònt di un tienda, establesimentu di horeca òf sportclub por yuda protegé propiedat, kliente i empleado. Pero un empresario tin ku kumpli ku sierto kondishon promé ku e tin mag di pone kámara. Tambe e mester sòru pa e violashon di privasidat di e kliente- i empleadonan ta ménos grave posibel. Kámara den hòki di pas paña, lugá di kambia paña òf baño ya ta bai muchu leu i ta prohibí.

Interes hustifiká
E empresario mester tin un asina yamá interes hustifiká pa usa vigilansia ku kámara, por ehèmpel, prevenshon di ladronisia òf protekshon di kliente i empleado.

Nesesidat di vigilansia ku kámara
Ta permití vigilansia ku kámara solamente ora esei ta nesesario, esta, na momento ku e empresario no por logra e meta otro manera. No tin otro opshon ku ta representá un violashon ménos grave di privasidat? Ademas, vigilansia ku kámara no por ta un medio riba su so; e mester ta parti di un pakete total di medida.

Evaluashon di privasidat
Promé, e empresario tin ku hasi un evaluashon di privasidat. Esei ta enserá ku e tin ku pisa interes di e klientenan i di su empleadonan kontra su mes interes.

Deber di notifikashon di vigilansia ku kámara
Promé ku e klientenan drenta paden, nan mester por sa ku tin vigilansia ku kámara. E empresario mester duna nan di konosé esei. Por ehèmpel e por pone bòrchi ku ta bisa esei. Si e no hasié, esei por ta kastigabel.

Plaso pa warda imágen di kámara
E empresario tin mag di warda imágen di kámara no mas ku kuater siman. Pero si a graba un insidente, manera ladronisia den tienda, e tin mag di warda e imágen te ora ku kaba di atendé esaki.

Tin mag di pone kámara di vigilansia den instituto di kuido?

Sí, bou di sierto kondishon, un instituto di kuido, manera un hospital òf kas di kuido tin mag di pone kámara di vigilansia. Tin mag di hasié den kaso ku esei ta nesesario pa, entre otro, protegé persona, edifisio i propiedat. Pero e violashon di bo privasidat mester ta ménos grave posibel.

Deber di notifikashon di vigilansia ku kámara
E instituto di kuido tin ku sòru pa tur hende sa ku tin kámara. Por ehèmpel e por pone bòrchi ku ta bisa esei. Si e instituto di kuido no hasié, esei por ta kastigabel.

Kámara skondí ta prohibí
No ta permití vigilansia sekreto ku kámara (vigilansia ku kámara skondí), esta, sin ku hende ta konsiente ku tin kámara.