Vigilansia ku kámara na trabou

Vigilansia ku kámara na trabou por yuda prevení ladronisia i daño na propiedat. Tambe un doño di trabou por usa kámara pa protekshon di su trahadónan i su posibel klientenan. Sinembargo, un doño di trabou tin ku kumpli ku sierto kondishon promé ku e tin mag di pone kámara, pasobra nan ta un violashon serio di e trahadónan su privasidat. Kámara skondí ta permití solamente den kaso sumamente eksepshonal.

Ki ora mi doño di trabou tin mag di pone kámara na trabou?

Bo doño di trabou tin mag di pone kámara solamente si e tin un asina yamá interes hustifiká i si e vigilansia ku kámara ta nesesario pa sirbi e interes ei.

Interes hustifiká
Un interes hustifiká di bo doño di trabou por ta: protekshon di su propiedat. Protekshon di bo mes i di e klientenan tambe por ta un interes ku ta hustifiká vigilansia ku kámara. Bo doño di trabou no tin mag di usa kámara ku e meta di evaluá abo komo trahadó. Esei lo ta un violashon muchu grave di bo privasidat.

Nesesidat di vigilansia ku kámara
Vigilansia ku kámara mester ta nesesario. Esei ke men ku bo doño di trabou no por logra e meta, por ehèmpel kombatimentu di froude, di otro manera. Promé, bo doño di trabou tin ku determiná si no tin otro medio ku por usa na lugá di vigilansia ku kámara i ku lo tin un efekto ménos drástiko riba bo privasidat. Ademas, vigilansia ku kámara no por ta medio riba su so; e mester ta parti di un pakete total di medida.

Evaluashon di privasidat
Si bo doño di trabou tin un interes hustifiká i vigilansia ku kámara ta nesesario, ainda e tin ku hasi un evaluashon di privasidat promé ku e por kuminsá usa vigilansia ku kámara. Esei ta nifiká ku bo doño di trabou tin ku pisa bo interes – i derechonan kontra su propio interes.

Deber di notifikashon di vigilansia ku kámara
Bo doño di trabou tin ku sòru pa abo i e posibel klientenan sa ku tin kámara. Por ehèmpel e por pone bòrchi ku ta bisa esei. Si bo doño di trabou no hasié, esei por ta kastigabel.

Uso di imágen pa otro meta ta prohibí
Si bo doño di trabou usa kámara di vigilansia pa protekshon di trahadó i/òf propiedat, e no tin mag di usa e imágennan pa eksigí bo kuenta ni pa evaluá bo funshonamentu. En prinsipio, bo doño di trabou tin mag di usa e imágennan solamente pa e meta pa kua a produsí na.

Mi doño di trabou tin mag di usa kámara skondí?

Nò, normalmente esei no tin mag. Pero si tin hopi ladronisia òf froude den boso organisashon, bou di sierto kondishon bo doño di trabou tin mag di usa kámara skondí (vigilansia sekreto ku kámara).

Kondishon pa kámara skondí
Bo doño di trabou tin mag di usa un kámara skondí solamente si e ta kumpli ku e siguiente kondishonnant:

  • Bo doño di trabou a purba di tur manera pero no ta logra para e ladronisia òf froude.
  • E uso di kámara skondí ta temporal (nunka no ta permití uso di vigilansia sekreto ku kámara riba base permanente!).
  • E violashon di privasidat di e empleadonan mester ta ménos grave posibel. Vigilansia ku kámara den baño, por ehèmpel, ya ta bai muchu leu.
  • Despues, bo doño di trabou mester laga e personanan konserní sa ku el a usa kámara skondí.

Filmashon pa usa den training ta prohibí
Bo doño di trabou no tin mag di filma bo den sekreto pa usa e material ei den training. Mystery shopping ku kámara skondí, por ehèmpel, ta prohibí. Bo doño di trabou tin mag di usa un kámara skondí solamente pa investigá kos manera ladronisia òf froude. I asta den kaso asina, mester usa esei solamente komo último rekurso. Pa tur otro meta, por ehèmpel pa training, kámara skondí ta un medida muchu drástiko.

Bo doño di trabou no tin mag di filma bo den sekreto ni si e pidi bo outorisashon promé. Komo empleado, sin duda, lo bo sinti bo preshoná pa duna bo doño di trabou outorisashon, asta si bo no ke pa e filma bo. Den un kaso asina, bo outorisashon no ta boluntario i p’esei e no ta bálido.

Vigilansia sekreto di empleado
Uso di kámara skondí ta kai bou di vigilansia sekreto di empleado i esei ta algu ku tin mag pero bou di sierto kondishon. Lo bo lesa mas riba e tópiko akí bou di Vigilansia di empleado.