Vigilansia ku kámara na skol

Mas i mas skol tin kámara instalá, entre otro pa prevení vandalismo i ladronisia. Pero un skol no tin mag di pone kámara sin mas. Esei tin mag solamente si e skol ta kumpli ku algun kondishon. Ta permití kámara skondí solamente den kaso sumamente eksepshonal.

Interes hustifiká
E skol mester tin un asina yamá interes hustifiká pa usa vigilansia ku kámara, manera protekshon di propiedat òf protekshon di alumno, dosente i bishitante.

Nesesidat di vigilansia ku kámara
Ta permití vigilansia ku kámara na skol solamente ora esei ta nesesario, esta, na momento ku e skol no por logra e meta otro manera. No tin otro opshon ku ta representá un violashon ménos grave di privasidat? Ademas, vigilansia ku kámara no por ta un medio riba su so; e mester ta parti di un pakete total di medida.

Evaluashon di privasidat
Promé, e skol tin ku hasi un evaluashon di privasidat. Esei ta enserá ku e skol tin ku pisa interes di e alumno-, dosente- i bishitantenan kontra su mes interes. Tambe e skol tin ku konsultá di antemano riba e plannan ku por ehèmpel ‘medezeggenschapsraad’ (konseho di partisipashon).

Deber di notifikashon di vigilansia ku kámara
E skol mester sòru pa e alumno-, dosente- i bishitantenan sa ku tin kámara. Por ehèmpel e por pone bòrchi ku ta bisa esei. Si e skol no hasié, esei por ta kastigabel.

Plaso pa warda imágen di kámara
E skol tin mag di warda imágen di kámara no mas ku kuater siman. Pero si a graba un insidente, manera ladronisia, e skol tin mag di warda e imágen te ora ku kaba di atendé esak.

Un skol tin mag di usa kámara skondí?

Nò, normalmente esei no tin mag. Pero si tin indikashon kla di, por ehèmpel, ladronisia òf froude di parti di alumno òf dosente, e skol tin mag di usa un kámara skondí (vigilansia sekreto ku kámara) bou di sierto kondishon.

Kondishon pa kámara skondí
Un skol tin mag di usa kámara skondí solamente si e skol ta kumpli ku lo siguiente:

  • E skol a purba di tur manera pero no ta logra para e ladronisia òf froude.
  • E uso di kámara skondí ta temporal (nunka no ta permití uso di vigilansia sekreto ku kámara riba base permanente!).
  • E violashon di privasidat di e empleadonan mester ta mas leve posibel. Vigilansia ku kámara den baño, por ehèmpel, ya ta bai muchu leu.
  • Despues e skol mester laga e alumno- i dosentenan konserní sa ku a usa kámara skondí.