Uso di dato médiko

Dato tokante un hende su salú ta delikado. P’esei mes, Lei di protekshon di dato personal BES (Wbp BES) ta stipulá ku nan ta ‘dato personal spesial’, i ku un organisashon tin mag di usa e datonan akí solamente si e ta kumpli ku sierto kondishon spesial. No ta trata akí solamente di dato médiko ku dòkter ta diagnostiká i registrá, sino tambe dato tokante un hende su salú físiko òf mental.

Deber di sekresia
Hende ku a base di nan profeshon ta traha ku dato médiko tin un deber di sekresia. Esei ta enserá ku en prinsipio nan no tin mag di duna otro hende informashon di un pashènt. E tipo di deber di sekresia ta varia di un profeshon pa otro.

Dunadó di kuido, manera dòkter, enfermero i sikoterapeuta ta mará na deber di sekresia médiko, i esei ta reglá den lei. Pa algun otro tipo di dunadó di kuido, manera trahadó sosial, tin un deber di sekresia a base di nan kódigo profeshonal. E empleadonan di e instituto di kuido (manera un hospital por ehèmpel) kaminda un hende ta risibí tratamentu tin un deber di sekresia via nan kontrato di trabou.

No ta tur ora un dòkter mester ta enbolbí den uso i dunamentu di dato médiko. Un organisashon pafó di ramo di kuido tambe por usa i interkambiá dato médiko, basta Wbp BES òf un otro lei ofresé un base pa hasi esei

Mi dunadó di kuido tin mag di duna otro hende mi datonan médikon?

Nò, en prinsipio no tin mag. Ta bou di sirkunstansia eksepshonal so bo dunadó di kuido tin mag di duna otro hende bo datonan médiko. Komo pashènt, bo mester por konfia ku loke bo konta un dunadó di kuido konfidensialmente ta keda sekreto. P’esei dunadó di kuido tin deber di sekresia. I meskos ta konta pa otro empleado di instituto di kuido, manera hospital.

Deber di sekresia médiko
Deber di sekresia médiko ta konta pa dòkter, dentista, botikario, sikólogo GZ, sikoterapeuta, fisioterapeuta, opstetra i enfermero. Si un dunadó di kuido violá su deber di sekresia médiko, bo por entregá un keho kontra dje a base di derecho disiplinario (‘wettelijk tuchtrecht’) òf derecho penal.

Deber di sekresia a base di kódigo profeshonal
Pa sierto otro profeshon, manera trahadó sosial, lei no ta fiha un deber di sekresia médiko, pero e dunadónan di kuido akí tin un deber di sekresia sí. E deber di sekresia ei ta reglá den un kódigo profeshonal. Den sierto kaso, por tin tambe regla di derecho disiplinario (interno) ku nan tin ku tene nan mes na dje.

Deber di sekresia pa empleado di instituto di kuido
Si bo sera un akuerdo di tratamentu ku un instituto di kuido, tambe tin un deber di sekresia (artíkulo 7:457 BW BES). Un akuerdo asina ta enserá ku lo bo risibí tratamentu na e instituto di kuido.

Algun di e empleadonan ku ta traha na e instituto tin un deber di sekresia médiko òf un otro deber di sekresia a base di un kódigo profeshonal. Pero pa algun otro empleado, manera sekretaria i esunnan ku ta traha ku kontabilidat, esei no ta e kaso. Pero nan tambe tin un deber kontraktual di mantené bo datonan sekreto, esta, tur loke nan haña sa tokante abo i bo tratamentu debí ku nan ta enbolbí den bo tratamentu.

Ki ora mi dunadó di kuido tin mag di violá su deber di sekresia médiko?

Tin diferente kondishon bou di kua bo dunadó di kuido (por ehèmpel bo dòkter di kas, dentista òf spesialista den hospital) tin mag di violá su deber di sekresia médiko. Den e kasonan ei sí bo dunadó di kuido tin mag di duna otro hende bo datonan médiko. E tres kondishonnan di mas importante ta aparesé aki bou.

Outorisashon
Bo dunadó di kuido por duna otro hende bo datonan médiko riba su propio inisiativa, òf otro hende por pidi bo dunadó di kuido bo datonan médiko. Den tur dos kaso, bo dunadó di kuido tin mag di duna nan bo datonan basta bo a duna outorisashon pa esei.

Promé ku bo por duna bo outorisashon, bo mester risibí tur informashon tokante pakiko nan lo mester duna otro hende bo datonan. Sea bo dunadó di kuido mes por duna bo e informashon ei (eventualmente na nòmber di e persona òf organisashon ku a pidié bo datonan) òf e persona òf organisashon ei mes por hasié.

Eksigensia di lei
Bo dunadó di kuido tin mag di violá su deber di sekresia médiko ora ta nesesario a base di algu ku lei ta eksigí. Ehèmpel di esaki ta algun disposishon ku tin pará den Lei di entiero BES (Begrafeniswet BES) i Lei di kremashon BES (Crematiewet BES), Desishon riba Seguro di Kuido BES (Besluit Zorgverzekering BES) i Lei di Seguro General pa Gastu Spesial di Malesa BES (Wet Algemene Verzekering Bijzondere Ziektekosten BES).

Konflikto di deber
Bo dunadó di kuido tin mag di violá su deber di sekresia médiko den kaso ku tin un konflikto di deber. Un konflikto asina ta presentá si kumplimentu ku e deber di sekresia médiko lo resultá den un daño òf peliger serio pa bo persona òf otro hende. Ta den kaso hopi eksepshonal so por papia di un konflikto di interes; mester ta un emergensia grave, por ehèmpel, si tin ku mèldu un kaso di abusu di mucha.

Bo dunadó di kuido mester a purba tur otro manera di resolvé e problema sin tin ku violá su deber di sekresia médiko. I promé, bo dunadó di kuido tin ku purba haña bo outorisashon tòg pa duna otro hende bo datonan médiko. Bo dunadó di kuido mester por hustifiká dikon e tin ku violá su deber di sekresia.

Den ki otro kaso mi dunadó di kuido tin mag di duna hende mi datonan médiko?

Bo dunadó di kuido tin mag di violá su deber di sekresia médiko si bo dun’é outorisashon pa hasié, si lei ta eksigí esei òf den kaso ku ta eksistí un asina yamá konflikto di deber. Ademas, tin tres otro kaso den kua bo dunadó di kuido por duna otro hende bo datonan médiko sin bo outorisashon.

Esnan direktamente enbolbí
Bo dunadó di kuido tin mag di duna informashon na esnan ku ta direktamente enbolbí ku bo tratamentu i na nan suplente- òf remplasantenan. Eseinan por ta otro dunadó di kuido, pero tambe sekretaria òf personal di kontabilidat.

Tin mag di duna otro persona bo datonan solamente te asina leu ku ta nesesario pa e personanan akí por kumpli ku nan tareanan. P’esei, ta sali for di e punto di bista ku bo ta outorisá esei. Si bo ophetá, bo dunadó di kuido no tin mag di duna nan bo datonan médiko.

Si bo dunadó di kuido ta usa un fail di pashènt elektróniko na nivel nashonal òf regional, tin mag di interkambiá bo datonan na nivel nashonal solamente si bo outorisá esei di antemano. Pa interkambio na nivel regional tambe tin bes bo outorisashon previo ta nesesario.

Representante legal
Bo dunadó di kuido tin mag di duna bo representantenan legal bo informashon te asina leu ku ta nesesario pa pidi nan outorisashon pa un tratamentu. Ta asina por ehèmpel den kaso ku mester trata un pashènt mayor di edat ku ta inkompetente (inkapas di tuma desishon pa su mes) òf un mucha bou di 16 aña. Den kaso asina, e dunadó di kuido ta pidi outorisashon di e representante(nan) legal di e pashènt inkompetente òf e mucha. Den kaso di mucha, mayoria di bes ta un òf tur dos mayor ta represent’é.

Un dunadó di kuido no tin mag di duna representante legal dato si esei lo no pas ku un bon dunamentu di kuido, por ehèmpel si esei lo ta kontra interes di e pashènt inkompetente òf e mucha.

Investigashon sientífiko
Generalmente, tin mag di usa bo datonan médiko pa investigashon di sientifiko solamente si bo a outorisá esei. Den sierto kaso i bou di sierto kondishon èkstra, esei por sosodé sin bo outorisashon tambe, pero solamente, por ehèmpel, si ta rasonablemente imposibel pa pidi bo outorisashon. Ademas, mester tin sierto garantia pa protegé bo privasidat.

Mi dunadó di kuido tin mag di duna mi kompania di seguro di kuido mi datonan médiko?

Sí, esei tin mag. Lei ta eksigí pa bo dunadó di kuido duna bo kompania di seguro di kuido sierto dato médiko, manera dato ku ta nesesario pa por atendé e fakturanan di bo tratamentu.

Mi dunadó di kuido tin mag di duna otro persona mi datonan médiko pa kobransa di faktura?

Sí, esei tin mag. Hopi bes, no ta e dunadó di kuido mes ta traha i kobra e fakturanan di nan klientenan. Nan ta laga un ofisina di atministrashon òf un kompania di ‘factoring’ hasi esei pa nan, òf un ofisina di kobransa si bo no paga bo faktura na tempu. Pa un organisashon asina por traha faktura ku spesifikashon, e tin mester di dato médiko.

Bo dunadó di kuido tin mag di duna e organisashon solamente e datonan ku ta nesesario pa traha i kobra e faktura, i e organisashon tin mag di usa e datonan ei pa e meta ei so.

Na ken mi por akudí si mi tin un pregunta òf keho tokante e echo ku a duna otro persona mi datonan médiko?

Si bo tin un pregunta òf keho, por ehèmpel pasobra bo ta haña ku bo dunadó di kuido a violá su deber di sekresia médiko, papi’é promé ku bo dunadó di kuido.

Boso no ta yega na un solushon?
Si bo no a keda satisfecho ku resultado di e kòmbersashon òf bo no ta deseá di papia ku e dunadó di kuido, tin diferente manera pa bo entregá bo keho.