Dokumento di identidat

Tin bes, un organisashon tin ku determiná un hende su identidat, por ehèmpel di un kliente, entre otro pa prevení froude. Un organisashon por hasi esei di diferente manera. Si un manera tin mag òf nò ta dependé di e lei ku ta aplikabel i di e nesesidat.

Mustra dokumento di identidat
Hopi bes, si un hende mustra su dokumento di identidat, manera su pasport òf sédula di identidat, esei mes ta basta. Ta yama esaki ‘legitimashon’ òf ‘identifikashon’.

Skirbimentu di dato
Despues ku e persona mustra su dokumento di identidat, e organisashon lo por skirbi e tipo di dokumento di identidat i su number. Lei ta eksigí pa sierto organisashon skirbi otro dato personal ku ta aparesé riba un persona su dokumento di identidat.

Kopia di dokumento di identidat
Ta komo eksepshon so un organisashon tin mag di saka kopia òf skèn un hende su dokumento di identidat.

Mi por pidi pa nan koregí òf kita mi datonan personal?

Bo tin derecho di pidi un organisashon koregí òf kita sierto dato personal di bo. Bo por hasi esei den kaso ku e datonan ta inkorekto, inkompleto òf den kaso ku nan no ta relevante (mas).

Ki mi por hasi si mi tin un pregunta òf keho pasobra un organisashon a skirbi dato ku tin riba mi dokumento di identidat òf a kopia e dokumento?
Semper, akudí ku bo pregunta òf keho promé na e organisashon ku a skirbi dato ku tin riba bo dokumento di identidat òf a kopia e dokumento. Si bo tin un keho anto abo i e organisashon no por yega na un solushon, tin algun paso adishonal ku bo por dal.

Kiko ta e riesgonan relashoná ku kopiamentu di dokumento di identidat?

Un dokumento di identidat, manera un pasport òf sédula di identidat, ta kontené vários dato personal. Rekolekshon i prosesamentu di dato personal ta mará na regla estrikto den lei, debí ku tin diferente riesgo di privasidat enbolbí. Por ehèmpel, kopiamentu òf skènmentu di dokumento di identidat na gran eskala ta trese kuné un peliger di froude di identidat.
Ta papia di froude di identidat ora un hende hasi uso ilegal di un otro hende su datonan personal, por ehèmpel pa habri un kuenta di banko. Un hende ku bira víktima di froude di identidat por keda sufri daño finansiero i riba tereno sosial pa añanan largu.

Dato personal spesial
Dokumento di identidat ta kontené asina yamá dato personal spesial. Ta trata akí di dato personal delikado, ku ta bisa algu tokante e persona su rasa, salú òf kreensia, por ehèmpel. Mal uso di e datonan akí por hiba entre otro na diskriminashon òf isolashon sosial di e persona konserní.

Komo doño di trabou, mi tin mag di saka kopia di e dokumento di identidat di mi empleadonan?

No, e lei di impuesto di salario (loonbelasting) ta preskribí ku e empleado mester duna su doño di trabou informashon ku ta alkaso pa asina por determiná e impuesto ku tin ku wòrdu paga.

Bo tin ku kontrolá identidat di bo empleado personalmente a base di un dokumento original.
E informashon (loonbelastingverklaring) mester wòrdu warda por lo ménos sinku aña kompleto di kalènder despues ku e empleado sali for di servisio.

Deber di identifikashon na momento di inspekshon
Komo doño di trabou, bo no tin deber di tin un kopia di e dokumento di identidat di bo empleadonan pa ora un inspekshon di labor tuma lugá. Na momento ku un inspekshon tuma lugá sí tin un deber di identifikashon. E ora ei, bo empleadonan mes tin ku presentá nan dokumento di identidat na e ámtenarnan ku ta hasiendo e inspekshon.

Un negoshi di hür outo tin mag di saka kopia di mi dokumento di identidat?

Nò, esei no tin mag. Tin mag di saka kopia di un dokumento di identidat solamente si lei ta eksigí esei.

Kua ta e instansianan ku lei ta eksigí pa saka kopia di dokumento di identidat?

Lei ta eksigí pa banko, notario i kasino determiná identidat di nan klientenan. Pa nan por proba ku nan a kumpli ku e deber ei, nan tin ku saka kopia di dokumento di identidat òf skèn nan.

Ki mi por hasi si un organisashon ke saka kopia di mi dokumento di identidat?

Puntra e organisashon pakiko mester saka kopia di bo dokumento di identidat (òf skèn e). Tin bes, un organisashon tin deber di saka un kopia pasobra lei ta bisa ku e tin ku hasié. Si ta asina, e organisashon tin ku informá bo tokante e eksigensia legal ei.

Saka kopia sin ku lei ta eksigí esei
Si lei no ta eksigí pa un organisashon saka kopia di bo dokumento di identidat anto e organisashon ke hasi esei tòg, bo por opta pa laga nan haña un kopia di bo dokumento di identidat, pero pa bo minimisá mas tantu posibel e riesgo ku bo ta kore:
Pidi e organisashon pa tapa bo potrèt ora nan saka e kopia, òf skonde e potrèt bo mes riba e kopia.

Skirbi riba e kopia ta pa kua organisashon e kopia ta bai i riba ki fecha bo a entregá nan e kopia. Pidi nan e kopia bèk, por ehèmpel ora bo ta ‘check out’ di un hotèl.

Deber di identifikashon na momento di inspekshon
Komo doño di trabou, bo no tin deber di tin un kopia di dokumento di identidat di bo empleadonan pa ora un inspekshon di labor tuma lugá. Na momento ku un inspekshon tuma lugá sí tin un deber di identifikashon. E ora ei, bo empleadonan mes tin ku presentá nan dokumento di identidat na e ámtenarnan ku ta hasiendo e inspekshon.