Tokante Komishon Supervisor di Protekshon di Dato Personal BES
Komishon Supervisor di Protekshon di Dato Personal BES (Komishon), komo instansia independiente di supervishon, tin e tarea di vigilá ku prosesamentu di dato personal ta tuma lugá di akuerdo ku Lei di protekshon di dato personal BES (Wbp BES). Komishon – lantá na aprel di 2014 – tin ademas e enkargo di supervisá prosesamentu di dato polisial i e atministrashonnan básiko di dato personal BES na Hulanda Karibense.
Na Hulanda Karibense, ta awor a kaba di dal e promé pasonan riba tereno di protekshon di dato personal. P’esei, Komishon a disidí ku den e promé dos pa tres añanan, e lo konsentrá prinsipalmente riba dunamentu di informashon i konsientisashon di poblashon riba e tema di protekshon di dato personal. Despues di esei, Komishon lo pasa pa e fase di supervishon, ku lo por inkluí ouditoria.
Loke Komishon ke logra ta pa tantu pueblo en general komo e organisashonnan ku tin riba e islanan bira konsiente di nan responsabilidat di atendé ku dato personal na un manera responsabel.
Kon Wbp BES a bini na vigor
Promé ku introdukshon di Wbp BES, no tabatin un reglamentashon general na Boneiru, Sint Eustatius i Saba riba tereno di prosesamentu di dato personal. Algun tratado internashonal sí tabata ofresé protekshon di e derecho di privasidat. Entrante 10 di òktober 2010, e protekshon duná na dato personal den artíkulo 10 di Konstitushon a bira aplikabel i Kombenio di Straatsburg tokante dato i su Protokòl komplementario a bira aplikabel na Hulanda Karibense tambe.
Wbp BES ta produkto direkto di e último kombenio menshoná aki riba i su protokòl ku ta kontené norma detayá pa protekshon di dato personal. Wbp BES ta basá riba Wet bescherming persoonsgegevens (Wbp), ku ta aplikabel na e parti europeo di Hulanda. Sinembargo, tin diferensia. Por ehèmpel, Wbp BES no ta inkluí un deber di mèldu sierto tipo di prosesamentu di dato serka e instansia di supervishon ni e no ta menshoná ku e instansia di supervishon tin ku hasi investigashon previo den kaso di prosesamentu di dato ku riesgo haltu. Tampoko Wbp BES no konosé e posibilidat di opta pa nombra un funshonario enkargá ku protekshon di dato.
E dokumentonan parlamentario ta mustra ku Legisladó kier a introdusí e diferensianan akí pa evitá di pone un karga muchu pisá riba e organismonan atministrativo i empresanan na Hulanda Karibense. Na 2013, Ministerio di Siguridat i Hustisia a instalá un tim di proyekto yamá Proyekto Implementashon di Wbp BES (‘Project implementatie Wbp BES’), ku e meta di organisá, posishoná i haña personal pa e komishon. E tim di proyekto a pone man na obra pa organisá e instansia akí su funshonamentu i, tentativamente, definí su tareanan, habriendo kaminda asina pa Komishon por a kuminsá operá entrante 1 di aprel 2014.
E Miembronan di Komishon
Komo resultado di e tim di proyekto Proyekto Implementashon di Wbp BES, entrante 1 di aprel 2014 a nombra un presidente i dos otro miembro mediante dekreto real. Riba e mesun fecha ei, Areglo di posishon hurídiko di miembro di Komishon Supervisor di Protekshon di dato personal BES (Regeling rechtspositie leden Commissie toezicht bescherming persoonsgegevens BES) tambe a drenta na vigor. E areglo akí ta stipulá entre otro ku mester publiká tantu e funshon di kada miembro den Komishon, komo e otro funshonnan ku e miembronan tin. Un lista aktualisá di nan funshon i otro funshonnan ta disponibel tantu serka Minister di Siguridat i Hustisia komo serka Komishon, i por hañ’é riba e wèpsait akí tambe.
Funshón prinsipál y adishonál di e Komishón di supervisión y protekshón di Dato Personál Bonaire, Sint Eustatius y Saba (fihá di aprel 2026)
Konforme artíkulo 2, section 3 di e Reglamentu di posishón hurídiko di e miembronan di e Komishón di supervisión y protekshón di Dato Personál Bonaire, Sint Eustatius y Saba (CBP BES), CBP BES ta publiká e funshón prinsipál y adishonál di su miembronan.
Funshón prinsipál y adishonál di e presidente di CBP BES, Sr. Glenn Thodé:
- Funshón prinsipál: kolaboradó den enseñansa, Rijksuniversiteit Groningen
- Miembro supervishon di finansias isla nan BES.
- Presidente komishon interinsular deliberashon historia di sklabitut
- Presidente di Nature Trust
- Miembro di NWO komishon di Programma Investigashon Caribense
- Miembro di kapitulo pa e órden sivíl.
- Miembro di direktiva no-ejecutivo di Fundashon Oranjefonds.
Funshón prinsipál y adishonál presidente suplente di CBP BES, Sra. Shirley A. Cecilia:
- Ningún funshón adishonál
Funshón prinsipál y adishonál miembro di CBP BES, Sr. Jolien Kuitert
- Mentór na Sentro di Estudio pa Administrashon di Hustisia (SSR)
- Presidente di Fundashon Amigunan di Hòfi Botániko Zuidas
- Miembro di hunta di Asosiashon Amigunan di e Orkesta Residentie (VVRO)